Stóma- og þvagleggjaþjónusta Stuðlabergs heilbrigðistækni

Okkur er það ánægja að tilkynna að stóma- og þvagleggjaþjónusta Stuðlabergs heilbrigðistækni ehf. hefur fengið Úlfhildi Guðjónsdóttur hjúkrunarfræðing til starfa. Úlfhildur mun ásamt Katrínu Klöru Þorleifsdóttur hjúkrunarfræðingi sinna þessari mikilvægu þjónustu.

Úlfhildur hefur langa reynslu af hjúkrunarstörfum; hún starfaði á Krabbameinsdeild Landspítalans frá útskrift frá Háskóla Íslands árið 2006 til ársins 2012. Þá hóf hún störf hjá heimahjúkrun Reykjavíkurborgar og starfaði þar til ársins 2022, bæði sem almennur hjúkrunarfræðingur og síðar sem teymisstjóri. Auk þessa hefur Úlfhildur starfað á krabbameinsdeild Ringerike spítala í Hønefoss í Noregi.

Katrín Klara ætti að vera mörgum kunnug en hún hefur sinnt stóma- og þvagleggjaþjónustu Stuðlabergs síðustu átta árin. Á þeim tíma hefur hún öðlast þekkingu sem nýtist viðskiptavinum vel.

Þjónustan er opin virka daga frá klukkan 9 til 16 og er staðsett á 2. hæð að Stórhöfða 25. Hægt að panta vörurnar með tölvupósti eða símleiðis. Sækja má pantanir eða fá vörurnar sendar heim. Einnig er hægt að óska eftir að sækja tilbúnar pantanir klukkan 16 til 18 í verslun Eirbergs Stórhöfða.

Stóma- og þvagleggjaþjónustan er ein sú mikilvægasta sem Stuðlaberg veitir, enda byggir hún á áratuga reynslu. Lögð er áhersla á afslappað umhverfi þar sem trúnaðar er gætt. Afgreiðsla og fræðsla er í höndum Katrínar og Úlfhildar sem leggja sig ætíð fram við að veita faglega en jafnframt persónulega þjónustu við val á viðeigandi vörum. Vörurnar eru í samningi við Sjúkratryggingar Íslands.

Fyrirspurnir og pantanir má senda á hjukrun@stb.is – sími 569 3195

Verið hjartanlega velkomin til okkar á Stórhöfðann. Með kæru þakklæti fyrir samskiptin.

Virðingarfyllst,

Starfsfólk Stuðlabergs heilbrigðistækni

Katrín Klara - hjúkrunarfræðingur	Úlfhildur - hjúkrunarfræðingur